Embusrwn , A Bodo Folk Short Story 

सानसेखालि मोनसे हाग्रामायाव मासे जादु गोरों एम्बु राजानि जोबोद धुम धामहै हाबा जागासिनो दंमोन। बे हाबायाव एम्बु राजाखौ बोर सास्रिनो खाथि खाला हाग्रामानि एम्बु राजा आरो फोरजाफोराबो लारि लारि फैगासिनो दंमोन। बे समावनो बै हाग्रामायाव सनाफुर रायजोनि राजखुंगुर मदद जांगिला अमर सिं बसुमतारियाबो गावनि सानैसो सेलाफोरजों गरायाव गाखोना मैहुराव फैदोंमोन। लामा गंसे एम्बुगोजा नुनानै राजखुंगुर अमर सिंङा रागा जोंखाङो आरो बियो गावजों फैफानाय सेलाफोरखौ बुंना एम्बुफोरखौ लामानिफ्राय जोखारहोयो आरो हौवा गोदान एम्बु राजाखौबो लाजि फोनाङो। बेखौ नुना एम्बु राजाया जोबोद रागा जोंखाङो। आरो राजखुंगुरखौ साव होना बुङो – “अ गियान गैयै मानसिनि फिसा राजखुंगुर नों दिनै सासे राजाखौ लाजि फोनांनायनि जाहोनाव आं नोंखो साव होयो, दिनैनिफ्राय नों गावनि गासै धन समपति आलो गोजोन रायजो सुख सान्ति नागारनानै मासे एम्बु जाना जिउ खुंनांगोन” होन्ना, लोगो लोगोनो समायना राजखुंगुरा एम्बुनि महर लायो। राजखुंगुरा एम्बु राजानियाव गाबै गाबै निमाहा बियो गावनि गोरोन्थिनि थाखै, बेखौ नुना एम्बु राजाया इसे अनखाङो आरो बिनो बे सावनिफ्राय बारगनायनि राहा होयो, नों जदि सासे जोबोद नायनो समायना राजखुंग्रिखौ हाबा खालामो बे एम्बुनि महरावनो अब्लासो नों मानसि महर मोनफिनगोन। जादु गोरों एम्बु राजाया राजखुंगुरनि रायजो आरो बिनि नखर सेलाफोरनि गोसोनिफ्राय राजखुंगुरखौ बावनाय जादु खालामना होयो आरो गोमोर लांङो। बै दिन्निफ्रायनो राजखुंगुरा मासे एम्बु जाना दैमा दैसा बिलो हाखर गिदिंलाबायगासिनो दं।

      दैज्लांनि जोब जोब अखा हानायजों दैमा दैसा बिलो हाखरफोरा दैजों बुंजोबना दं। बेखौ नुना  सानै बोराय बुरैया बिलोआव खखा साना दोनहैयो। अखा नायै सोरांसि सोरांसिनो बोराय बुरै सानैबो ना नांबाय खोमा होन्ना खखा नायनो थाङो बिलोआव। बोराया खखाखौ दैनिफ्राय बोखांना बोरियाव लखबफैयो, नाथाय खखायाव मासेबो ना नाङाखैमोन एम्बु मासेल दंमोन खखायाव बेखौ नुना बोराय बुरै सानैबो रागा जोंङो आरो एम्बुखौ बुथारनो नागिरो। बे समावनो एम्बुआ राव होयो – “आंखौ दाबुथार आंखौ दाबुथार, आं नोंसोरनि गासैबो खामानिखौ मावनानै होजोबगोन, नोंसोर जि थिनो बेखौनो मावजोबगोन। ” बेखौ नुना बोराय बुरै सानैबो दसे सानहाबो आरो बुरैया बोरायखौ बुङो – जोंहाथ गथ गथायबो गैजाया जदि बे एम्बुआ जों थिन्नाय गासैबो खामानिखौ मावना होजोबोबा जों बे बोराय बुरै अबस्थायाव खामानि मावनो गगोन होन्ना। बेखौ खोनाना बोरायाबो खोथायाथ नंगौआनो होन्ना एम्बुखौ बुथारा लासिनो नआव लांनो थि खालामबाय। आरो बोराय बुरै सानैबो एम्बुखौ नआव लाना थांबाय। नआव सहैना बोराया एम्बुनाव मुं सोङो, राजखुंगुर एम्बुआ गावनि मुंखौ खोन्थाहां जाब्लानो गोसोखांफिनो गावजे दा मासे एम्बुसो जाबाय आरो गावजे राजखुंगुर बेखौ खोन्थाबा फोथायनाय नङा बेखायनो बियो मुं गैया होन्ना बुंना लायो। बोराय आरो बुरैया बुंफिनो जेबो नङा दिनैनिफ्राय नोंनि मुंखौ जों एम्बुस्रोन दोनबाय आरो जोंहा रावबो गथ गथाय गैया बेखायनो नों जोंनि फिसाला जाना थादो होन्ना। राजखुंगुर एम्बुआबो खुसि खुसि बोराय बुरैखौ बिमा बिफा मानिना लायो।

      अखानायै एम्बुस्रोना बोराय बुरैखौ लिंहरना बुङो “आय आफा आं खामानिखौ हरावसो मावगोन सानाव मावा मानोना मानसिफोरा मासे एम्बुखौ हाल एवनाय नुयोब्ला नोंसोरखौ लाजि फोनांगोन।” बोराय बुरैयाबो गनायनानै लायो फिसालानि बुंनायखौ। बोराया गावनि हाफोरखौ फिसाला एम्बुस्रोन्नो दिन्थिना होजोबो। बेबायदिनो एम्बुस्रोना हर हराव दुब्लियाव थांना दुब्लिनि गासै एम्बुफोरखौ लिंहरजोबना हाल एवो खदाल जावो खोथिया फोयो माय गायो आरो सोरांसि जाबा नआव थाफैयो। बिदिनो बोसोर बारलांबाय आरो बोराय बुरैमोना गामिनि मादाव माहाजोनसिन आरो धोनिसिन जाबाय।

      एम्बुस्रोन मोन्नि गामि बारना दरसे हाग्रामा बारनानै मोनसे रायजो मोनो बै रायजोनि राजा धनिरामहा सासे नायल जाल जोबोद नायनो समायना फिसाजो सासे दंमोन, बिनि मुङा सनाथिमोन। सानसेखालि हराव सनाथिया सिमाङाव सासे मदद जांगिला राजखुंगुरबादि महर मोखां नायनो समायना सेंग्रा जोहोलाव दरसे हाग्रामा बारनानै मोन्नाय गामिनि धोनिसिन नखरनि फिसालाया गावखौ दोलै नोगोरै हाबा खालामना लांफैनाय सिमां नुयो। अखानायै सोरांस्लाब मोनि बिफानो सनाथिया सिमांनि खोथाखौ खोन्थायो। आरो बिजोंनो हाबा जाथारगोन होन्ना जिद खालामो। राजाया अन्जालि फिसाजोनि बाथ्राखौ लाखिना गावनि सेलाफोरखौ बै गामियाव थिनहरना हाबानि खौरां दैथायहरबाय।

      हजों एम्बुस्रोन आरो बोराय बुरैया धनिराम राजानि फिसाजोखौ बिहामजो मोनबोगोन्नि रंजानायजों गासै गामिखौनो बिबारजों देलायहोफबजोब्बाय। बिबारजों साजायफबनाय गरायाव गाखोना एम्बुस्रोना गामिनि रायजो राजाफोरखौ लाना धनिरामनि रायजो फारसे रावना होलाङो खाम सिफुं जथा दामै दामै। दसे गोजान लामा थांना धनिरामनि नायस हायै बेसेबा गिदिर राजमहलखौ नुना बयबो दसे सोमो नांहाब जोबो।

      धनिराम राजायाबो गावनि रायजोफोरखौ लाना फिसाजोनि सिमांनि जोहोलावखौ लांगोनायावनो नेगासिनो। फारि फारि बैराथि बारलांफा, सोरगिदिं आलारि बाथिनि जोंख्लाब जोंख्लिब। एम्बुस्रोन मोनाबो रायजो राजा मोसा मोसा धनिरामनि लांगोना सहैबाय। नाथाय धनिराम आरो बिनि रायजोफोरा गरायाव मासे एम्बुखौ नुनानै गोमोहाबो आरो हौवा गोदान्नि बिमा बिफानाव सोङो आंनि फिसाजोआ नुनाय जोहोलावा बहाथो जाया आंनि नायल जाल फिसाजोखौ हाबा खालामगोन बै जोहोलावा बहा होन्ना। अब्ला गरायनिफ्राय एम्बुस्रोना ओंखारबोना धनिराम राजाखौ बुङो, “आंनो जायखौ नोंथांनि फिसाजोआ सिमाङाव नुदों बै जोहोलावा आंनो” होन्ना नाथाय बे खोथाखौ खोनाना राजा आरो राजानि फोरजाफोरा ग्लाब ग्लाब मिनिजोबो। धनिराम राजाया रागा जोंखांना बुङो नों मासे एम्बु जाना आंनि सासेल फिसाजोखौ मोनगोन होन्ना बोरै सानखो आं सोरबा निखावरिनोबो हाबा हरगोन नाथाय मासे एम्बुनो माब्लाबाबो हाबा हरा होन्ना। आरो बिदिनो गोबां लाजि फोनांना एम्बुस्रोन मोनखौ होखारहरो। एम्बुस्रोनाबो राजाखौ बुंफिनो आं दिनै खोथा होबाय - नों आंखौ एम्बु होन्ना लाजि फोनांदों आरो राजखुंग्रिखौ आंनो हराखै सानसे नों गावनो आंनियाव निमाहा बिनांगोन आरो राजखुंग्रिनि हाबाखौबो आंजोंनो हरनांगोन। गोसोआव ला धनिराम राजा नों आरो नोंनि रायजोआव आंखाल जाजोबसिगोन होन्ना एम्बुस्रोना बिमा बिफा आरो रायजोफोरखौ लाना न फारसे थांफिनो।

      एम्बुस्रोना बिमा बिफानो गावनि गासै जाथायखौ खिन्थाना लाजोबो फारि फारिनो। बोराय बुरै आरो एम्बुस्रोनाबो मोनसे राहा दिहुनो। एम्बुस्रोना गावनि गामिनि आरो धनिरामनि रायजोनि गासैबो एम्बुफोरखौ गाबनो बाधा होना दिनो। बिथिं दैज्लां बोथोर जाहां जाहां नाथाय मासेबो एम्बुआनो गाबाखै जायनि जाहोनाव अखा हायाखै। धनिराम राजाया उसाव बादाव मा खालामगोन मा मागोन। रायजोनि फोरजाफोराबो राजानियाव अखा हायैनि आबाद मावनो हायैनि रादाब लाबोगासिनो। रायजोआव अखा गैयैनि जेबो आबादानो जाला। बिदिनो सानसे धनिराम राजानि रायजोआव आंखाल जाबाय आरो फोरजापफोरा उखैजानानै राजानियाव मदद बिनो फैयो नाथाय राजानि भरालावबो माय मायरं जेबो गैला। रायजोनि सुबुंफोरा राजाखौ बुंनो हमबाय जानो हागौ बै एम्बुस्रोनखौ लाजि फोनांनायखायनो रायजोनि एम्बुफोरा गाबगाबाय जायनि जाहोनाव अखा हायाखै बोथोरा बारगलांबा जों जेबो खालामनो हानाय नङा आरो गासैबो उखैजानै थैजोबगोन। महाराजा थौ जों एम्बुस्रोन्नाव निमाहा बिहैदोनि एम्बुस्रोनासो जोंखौ बे अलखदनिफ्राय बासायसिगोन। राजाया रायजोफोरनि मोखां नायना एम्बुस्रोन्नाव निमाहा बिनो अंखारलाङो।

      धनिराम राजाया गावनि गोरोन्थिनि थाखै एम्बुस्रोन्नाव निमाहा बियो। नाथाय एम्बुस्रोना सुजुगावनो गावनि बाथ्राखौ राजानियाव बुंथियो – महाराजा आंनों नोंथांनि फिसाजोखौ हाबा हरब्लासो आं नोंथांखौ निमाहा होगोन। राजाया जेबो राहा गैयै गावनि रायजोखौ आंखालाव थैनायनिफ्राय बासायनो गावनि नायल जाल सासेल फिसाजोखौबो एम्बुस्रोन्नो हाबा होनो राजि जायो। राजाया फिसाजोखौ लाबोना रायजो राजा आरो एम्बुफोरनि गेजेराव एम्बुस्रोनजों हाबा होयो। एम्बुफोराबो गाबस्राव जोबनानै एम्बुस्रोन आरो राजखुंग्रिखौ बोर सास्रियो, लोगो लोगोनो जोमैया खोरोमदावनानै जोब जोब अखा हायो आरो लोगो लोगोनो एम्बुस्रोना महर सोलायना सासे समायना मदद जांगिला राजखुंगुरनि महर लाफिनो। जादु गोरों एम्बु राजानि सावाबो दानगारजोबो। राजखुंग्रि सनाथिया बिफाखौ बुङो – आफा आं सिमाङाव नुनाय जोहोलावा बेनो होन्ना। बिदिनो गासै रायजोफोरा अखा मोन्ना रंजाखाङो, धनिराम राजाया राजखुंगुर बिजामादै मोन्ना बालाबगासे मोसाग्लांङो, राजखुंग्रियाबो गावनि सिमांनि जोहोलावखौ मोन्ना बारदै सिख्ला जाना सिउ सिउ बिरबायो आरो एम्बुस्रोनाबो मानसि महर मोनफिन्ना ग्रोम ग्रोम अख्रां खोरोमदावनाय खाम दामना मोसायो। गासैथिंबो रंजानायनि बोथोर। राजखुंगुर अमर सिङा राजखुंग्रि सनाथि आरो बोराय बुरै बिमा बिफाखौ लाना गावनि रायजो सनाफुर फारसे रावना होलाङो।

      दिनैबो बै जायगायाव दैज्लां जाहांबाथाय एम्बु फुजा होनाय आसार खान्थि नुनो मोनो। जाहाथे अखा मोजाङै फैनानै आबादा मोजां जायो आरो फिथाय थायो।